CAGAYAN – Sa gitna ng pag-aalala sa biglaang pagdagsa ng mga Chinese na estudyante sa Cagayan, sinabi ng Philippine National Police (PNP) na ang pagbubukas ng pinto ng Cagayan sa mga dayuhang estudyante bilang bahagi ng hakbang na palakasin ang lokal na ekonomiya.
“We were informed that these are all valid and that it has basis because there is an invitation by no less than the CHEd (Commission on Higher Education). Ang lalawigan, lalo na sa pamamagitan ng CHEd, ay nagbukas ng mga pintuan para sa tinatawag nilang internationalization kung saan ang mga dayuhang estudyante ay tinatanggap sa Cagayan para sila ay mag-aral sa lalawigan,” ani PNP spokesperson Col. Jean Fajardo.
“Ito ay bahagi ng pagsisikap ng lokal na pamahalaan, bahagi ng kanilang inisyatiba upang palakasin ang ekonomiya, pag-unlad ng Cagayan,” dagdag niya.
Nauna nang nagpahayag ang mga netizen at ilang mambabatas ng alalahanin sa seguridad sa umano’y biglaang pagdagsa ng mga Chinese na estudyante sa Cagayan. Ang lalong nagpalaki ng mga hinala ay malapit ang Cagayan sa mga site ng Enhanced Defense Cooperation Agreement (EDCA).
Ang EDCA ay isang kasunduan na nilagdaan ng Pilipinas sa Estados Unidos at nagbibigay-daan para sa mga sundalong Amerikano sa mga pasilidad ng militar.
Noong nakaraang taon, nagbigay ng go-signal si Pangulong Marcos na pataasin ang bilang ng EDCA sites mula lima hanggang siyam— dalawa sa pinakahuling idinagdag ay ang Naval Base Camilo Osias sa Sta. Ana, at Lal-lo Airport sa Lal-lo na parehong nasa lalawigan ng Cagayan.
Sa isang panayam sa radyo, sinabi ni Cagayan 3rd District Representative Joseph “Jojo” Lara na mahigit 4,500 Chinese ang kasalukuyang naka-enrol sa isang pribadong unibersidad sa Cagayan.
Ang tumaas na presensya ng mga estudyanteng Chinese ay iniulat din sa Cebu, kung saan matatagpuan ang isa sa limang orihinal na EDCA site: ang Benito Ebuen Air Base.
Sinabi ng netizens at ilang mambabatas na ang biglaang pagtaas na ito ay maaaring maglagay sa Pilipinas sa masamang sitwasyon sa usapin ng seguridad lalo na sa gitna ng mga isyu sa West Philippine Sea.
Ang mga ulat na ito ang nag-udyok sa Armed Forces of the Philippines na maglabas ng pahayag na susubaybayan nito ang pagdami ng mga estudyante sa gitna ng mga alalahanin sa espiya.
Sa panig ng PNP, sinabi ni Fajardo na walang problema hangga’t ang mga dayuhan ay mahigpit na sumunod sa mga batas ng Pilipinas.
Sa ngayon, sinabi ni Fajardo na wala pa silang natatanggap na reklamo kaugnay sa mga dayuhang estudyante na nananatili sa Cagayan. RNT
