PAMPANGA, Philippines – Nasabat ng Bureau of Customs (BOC)-Port of Clark, katuwang ang Philippine Drug Enforcement Agency (PDEA) at Clark Inter-Agency Task Force Against Illegal Drugs (CRK-IATFAID), ang tinatayang 4,140 gramo ng hinihinalang ketamine na nagkakahalaga ng ₱20.7 milyon.
Nabatid sa BOC na galing Amsterdam, Netherlands ang shipment at nakatakdang ipadala sa Valenzuela City. Idineklara itong “Compact Ceramic Fan” ngunit naharang matapos makitaan ng kahina-hinalang imahe sa isinagawang X-ray inspection ng BOC.
Dahil dito, isinailalim sa physical examination ang shipment kung saan natuklasan ang pitong transparent plastic bag na naglalaman ng puting mala-kristal na substansiya na hinihinalang ketamine.
Sa paunang pagsusuri gamit ang spectrometer, lumabas ang “Special K” reading na indikasyon ng posibleng presensya ng ketamine.
Isinailalim naman sa laboratory analysis at confirmatory testing ng PDEA ang mga sample upang makumpirma ang uri ng nakumpiskang substansiya.
Pinangunahan ang operasyon ng Enforcement and Security Service–Customs Anti-Illegal Drug Task Force (ESS-CAIDTF), Customs Intelligence and Investigation Service (CIIS), at X-Ray Inspection Project (XIP). JAY Reyes
