MANILA, Philippines – Naghain ng petisyon ang United Nationalist Alliance o UNA sa Makati Metropolitan Trial Court, na naka-angkla sa Section 35 ng Republic Act 8189 (The Voter’s Registration Act of 1996), na naglalayong madiskwalipika ang mahigit 10,000 di umano’y mapanlinlang na mga rehistro na hindi bonafide na residente ng Makati ngunit hindi wastong nakalista noong nakaraang taon ng voter registration.
Iginiit ng UNA na ito ay hindi lamang isang legal na aksyon kundi isang laban upang protektahan ang kapayapaan ng darating na halalan sa Lunsod ng Makati.
Ayon sa UNA, hindi hahayaan ng mga tunay na residente ng Makati na magdikta sa kinabukasan ng Lunsod ang panlilinlang at pandaraya.
Natuklasan ng UNA ang mga nakakaalarmang iregularidad sa listahan ng mga botante ng Makati sa 1st at 2nd legislative districts, kabilang ang mga solong address na nagho-host ng daan-daang mga nagparehistro, mga bakanteng lote at barong-barong na nakalista bilang mga tirahan, at maging ang mga pribadong ari-arian na mapanlinlang na inaangkin ng mga estranghero.
Batay sa impormasyon mula sa mga residente ng Makati, at na-validate ng sariling imbestigasyon ng grupo, mayroong mahigit 50,000 flying voters na nakalusot sa roster of voters ng Lunsod.
Lumalabas din anila na ang ilang opisyal ng barangay ay kasabwat sa pamamagitan ng pagbibigay ng Barangay Certificates of Residency para sa mga hindi residente ng Makati nang hindi tinitiyak kung sila nga ay naninirahan sa kani-kanilang mga ibinigay na address.
Ang petisyon ng UNA ay naglalayong panagutin ang 10,558 na mapanlinlang na mga rehistro upang mapangalagaan ang integridad ng halalan sa Makati.
Noong Oktubre 2024, tinutulan ng UNA ang paglipat ng mga nakalistang rehistrong ito, na nagresulta sa mahigit 3,000 “flying registrants” ang tinanggihan ng pagpaparehistro ng Komisyon.
Hinihimok ng grupo ang Comelec na gumawa ng agarang aksyon na imbestigahan at tanggalin itong mga mapanlinlang na mga botante. Dave BaluyotÂ