13 beterano, pinarangalan sa Bataan

BATAAN – Bilang pagkilala sa kabayanihan at katapangan sa pakikipaglaban at pagtatanggol sa kalayaan ng bayan laban sa mga mananakop noong Ikalawang Pandaigdigang Digmaan, pinarangalan at binigyang-pugay ng Bataan Provincial Government ang 13 nabubuhay pang mga beterano sa Bataan kasabay ng paggunita at selebrasyon ng ika-84 na taon ng Araw ng Kagitingan.

Pinangunahan nina Bataan Governor Joet Garcia at 2nd District Congressman Abet Garcia ang pagpaparangal sa mga sundalong beterano na sumabak noon sa digmaan laban sa mga mananakop na Hapon, bilang pagpupugay at pagkilala sa kabayanihang ipinamalas ng mga ito.

Bahagi rin ng programa ang pagtatanghal ng bawat bayan sa Bataan kung saan ipinakita ang pagbabalik-tanaw sa kasaysayan ng pagbagsak ng Bataan o “Fall of Bataan” at ang makasaysayang “Death March” sa panahon ng Ikalawang Pandaigdigang Digmaan. Roel Tarayao