MANILA, Philippines – Mahigpit na hiniling ni Senador Risa Hontiveros sa Senate Blue Ribbon Committee na muling imbitahan sa susunod na pagdinig sa flood control scandal ang 18 dating bodyguards ni Ako Bicol Rep. Zaldy Co na naging kargador ng maletang panuhol.
Kasabay nito, kinuwestiyon din ni Senador Raffy Tulfo sa ginanap na organization and consultative meeting ng Blue Ribbon sa pamumuno ni Senador Erwin Tulfo ang “nagkakagulong” affidavit ng 18 dating sundalong AWOL dahil hindi nagkakatugma-tugma ang pahayag.
Sa ginanap na pagdinig nitong Lunes, June 8, sinabi ni Hontiveros na hindi dapat balewalain ng 18 bodyguards ang imbitasyon at himukin silang lumahok sa pagdinig sakaling tuluyan nang nabuo ang komite.
Hindi pa kumpleto ang miyembro ng komite, kaya nagkaroon ng pulong ng ilang miyembro matapos ihalal si Tulfo bilang bagong chairman ng grupo ni Acting Senate President Pro-Tempore Sherwin Gatchalian.
Ayon kay Hontiveros na kapag hindi dumalo ang 18 bodyguards, pinalampas nila ang opurtunidad na linawin ang kanilang statement at patunayan ang kanilang kredibilidad.
“Evidence should prevail, not just stories. That’s what we wanted to know today. But the 18 ex-bodyguards did not appear in the Senate (Blue Ribbon) today. This should have been an opportunity to find out what the truth is, but the resource persons are not here to verify their stories. It’s a pity,” aniya.
Sinabi naman ni Erwin na inimbitahan muli ang 18 bodyguards upang makaharap nila ang mga inaakusahan ng indibiduwal tulad ni Congressman Pepito Alvarez at Senador Vicente Sotto III na tumanggap ng maleta.
“Of course. Gusto nga natin marinig. Gusto sila i-confront. And that’s one of the reason kaya ayaw sumunod itong mga congressmen kasi wala silang ma-confront. They want to confront. They told me, sila JCA (JC Alvarez) sila Congressman Alvarez, pupunta kami dyan pagnandiyan sila. Sabi ko, okay, no problem, salamat,” ayon kay Erwin.
Samantala, kapwa kinuwestiyon nina Senador Bam Aquino at Raffy Tulfo ang affidavit ng18 bodyguards na dapat imbestigahan ng Office of the Ombudsman dahil marami ang idinawit na indibiduwal.
Ayon kay Aquino, naging bahagi ba ng fact-finding investigation ng Ombudsman ang affidavit ng 18 bodyguards o isinailalim sa preliminary investigation ang nilalaman nito sa ngayon.
Pinalilinaw din ni Aquino sa Ombudsman kung ano ang isinagawang pagkilos ng ahensiya sa alegasyon dahil umaasa ang publiko na tutukuyin kung sapat ang probative value at merit ng kanilang salaysay na dapat magkaroon ng pormal na imbestigasyon.
Inihayag naman Atty Karen Batu, chief ng records division ng Ombudsman na lahat ng dokumento na nakahain sa ahensiya ay sumasailalim sa masusing pagsusuri.
“When these documents were evaluated by our lawyer-evaluators and reviewed and approved by our officials, we sent a notice to Atty. Levito Baligod stating that the office requires individual affidavits from the marines so that each can personally state what they know regarding the allegations,” aniya.
Sinabi ni Batu na inatasan nila si Atty. Levito Baligod na magsumite ng hiwalay na affidavit ang bawat isa sa 18 bodyguards na hindi pa isinusumite ng naturang abogado habang isinusulat ang balitang ito.
Sa kanyang bahagi, sinabi naman ni Raffy na pawang hearsay ang mga testimonya ng 18 bodyguards dahil nag-uumpugan ang salaysay sa flood control scandal na nagsasabing sila mismo ang nagdala ng male-maletang salapit sa sangkot na indibiduwal.
“Of course we want the real culprits to be charged and held accountable, whoever actually received the money,” aniya sa organizational meeting ng Blue Ribbon Committee.
Sinabi ni Tulfo na pawang “highly inconsistent” ang affidavit ng mga bodyguards at kapos sa verifiable backing tulad ng dokumento, screenshots o recorder conversations.
“Their statements keep changing, pushing forward and pulling back… It is nothing but hearsay. So how will the Ombudsman handle that to make the case tight against anyone who actually received the money?” tanong niya. Ernie Reyes
