MANILA, Philippines – Bagsak sa selda ang dalawang lalaki na sangkot umano sa droga makaraang mahuli ng pulisya sa akto habang sumisinghot umano ng shabu sa makakaibang lugar sa Valenzuela City.
Sa ulat ni Police Investigator P/MSg. Ana Liza Antonio kay Valenzuela Police Chief P/Col. Joseph Talento, nakatanggap ng impormasyon ang mga operatiba ng Station Drug Enforcement Unit (SDEU) hinggil sa pagkakasangkot umano sa illegal drug activities ni alyas “Henry”, 50, ng C. San Juan St., Brgy., Pasolo.
Kaagad namang inatasan ni SDEU Chief P/Lt. Sherwin Dascil ang kanyang mga tauhan na puntahan ang nasabing lugar para alamin kung may katotohanan ang naturang report.
Pagdating sa lugar, naaktuhan nina PSSg Paul Bernal at PCpl Isagani Manait ang suspek na sumisinghot umano ng shabu sa loob ng kanyang bahay na naging dahilan ng kanyang pagkakaaresto dakong alas-11:25 ng Miyerkules ng gabi.
Nakumpiska sa suspek ang isang plastic sachet na naglalaman ng nasa 0.17 gramo ng hinihinalang shabu na nagkakahalaga ng P1,156, isang nakabukas na plastic sachet na may bahid ng umano’y shabu at ilang drug paraphernalias.
Samantala, huli din sa akto nina PCpl Elmer Olieca at Pat Sherwin Caampued, kapwa nakatalaga sa Police Sub-Station 2 ang 48-anyos na si alyas “Romeo”, na bumabatak rin umano ng shabu sa isang bahay sa San Gregorio St., Brgy., Gen T De Leon pasadoalas-11:20 ng Martes ng gabi.
Nasamsam sa kanya ang isang nakabukas na plastic sachet na may bahid ng hinihinalang shabu at drug paraphernalias.
Ayon sa pulisya, nasampahan na ang mga suspek ng kasong paglabag sa R.A 9165 o ang Comprehensive Dangerous Drug Act of 2002 sa Valenzuela City Prosecutors Office. Merly Duero
