Home METRO 2 kalaboso sa ₱204K shabu sa Pasay

2 kalaboso sa ₱204K shabu sa Pasay

MANILA, Philippines- Nagsagawa ng buy-bust operation ang mga tauhan ng District Drug Enforcement Unit (DDEU) sa pakikipagtulungan ng ng District Investigation Division (DID) ng Southern Police District (SPD) at Sub-Station 4 ng Pasay City police na nagresulta sa pagkakaaresto ng dalawang drug suspects at pagkakumpiska ng ₱204,000 halaga ng shabu bago mag-hatinggabi ng Lunes, Pebrero 3.

Kinilala ni SPD director PBGEN Manuel Abrugena ang mga nadakip na suspek na sina alyas Christian, 28, at alyas Reynaldo, 55, kapwa tricycle driver.

Base sa report na natanggap ni Abrugena, nadakip ang mga suspek dakong alas-11:40 ng gabi sa Barangay 134, Pasay City.

Sa isinagawang buy-bust operation ay nakuha kay alyas Christian ang 25 gramo ng hinihinalang shabu, buy-bust money, at isang android phone habang nakumpiska naman kay alyas Reynaldo ang limang gramo ng shabu kung saan ang kabuuang halaga ng nakumpiskang shabu sa mga suspek na 30 gramo ay nagkakahalaga ng ₱204,000.

Ang nakumpiskang ebidensya ay dinala sa SPD Forensic Unit para sumailalim sa chemical analysis.

Nahaharap sa kasong paglabag sa Sections 5 at 11 na nakapailalim sa Article II ng Republic Act No. 9165 (Comprehensive Dangerous Drugs Act of 2002) ang mga suspek na kasalukuyang nakapiit sa custodial facility ng DDEU-SPD.

“This successful operation is a testament to our relentless efforts to rid our communities of illegal substances. We will continue to intensify our anti-drug operations to ensure the safety and well-being of our citizens,” ani Abrugena. James I. Catapusan