MANILA, Philippines – Dalawang indibidwal na inaresto ng National Bureau of Investigation (NBI) 10 taon na ang nakalilipas ay napatunayang guilty sa pagkidnap sa negosyanteng si Teoderico Ozaeta, ayon sa NBI nitong Miyerkules.
Hinatulan ng Lipa City Regional Trial Court Branch 13 sina Francisco Batiquin Quiamco at Rammel Eslao Relos ng reclusion perpetua na walang eligibility para sa parole.
Dinukot nina Quiamco at Relos ang negosyante noong Hulyo 24, 2015, sa Batangas City at humingi ng P30-million ransom.
Nag-ugat ang kaso matapos ang operasyon ng NBI na nagligtas sa biktima ng kidnapping sa Mangatarem, Pangasinan, noong Hulyo 30, 2015.
Natunton ng mga awtoridad ang lokasyon ng mga suspek mula sa closed-circuit television at cell phone locators, dahil ang mga kidnapper ay patuloy na nakikipag-ugnayan sa pamilya ng biktima.
Inaresto ang dalawa matapos silang masundan sa isang botika kung saan inaasahang bibili ng gamot ang biktima na isang diabetic.
Dinawit naman ng mga kidnapper si Walter Ozaeta, ang pinsan ng biktima, na sinasabing siya ang utak sa pagdukot.
Si Ozaeta, isa ring small town lottery (STL) operator na kilala sa kanyang alyas na Mike Macalindong, ay inaresto noong Setyembre 19, 2019 dahil sa kasong kidnapping.
Ito ay matapos malaman ni South Cotabato Governor Reynaldo Tamayo Jr. ang arrest warrant ni Ozaeta mula sa isang opisyal ng Batangas matapos makipagpulong sa operator ng STL.
Si Walter Ozaeta ay nasa ilalim ng kustodiya ng Criminal Investigation and Detection Group at ang kanyang paglilitis ay patuloy pa rin.
Noong 2015, sinabi ni NBI Director Virgilio Mendez na ang mga dumukot ay bahagi ng isang mahusay at organisadong sindikato. RNT/MND
