MANILA, Philippines – Hinahangad ng gobyerno ng Estados Unidos ang extradition ng televangelist na si Apollo Quiboloy.
Kinumpirma ni Philippine Ambassador to the United States Jose Manuel “Babe” Romualdez na nagpadala ang US government ng mga dokumento tungkol sa extradition ni Quiboloy sa Department of Justice.
“I’m confirming documents sent to [the] DOJ,” ani Romualdez.
“Documents pertaining to the extradition request [were] sent to the DOJ,” dagdag niya.
Ayon kay Romualdez, ang gobyerno ng US ay naghahanap ng extradition kay Quiboloy mula noong Hunyo.
Samantala, tumanggi ang Department of Foreign Affairs na magkomento sa usapin, sa halip ay isinangguni ang mga tanong ng media sa DOJ.
“I will know, later.” Sinabi ni Justice Secretary Jesus Crispin Remulla, nang tanungin kung natanggap ng DOJ ang mga dokumento ng kahilingan sa extradition. Kalaunan, sinabi niya na “I was told by the DFA Secretary, Tess Lazaro that they haven’t received any request for extradition.”
Si Quiboloy ay kinasuhan ng federal grand jury sa United States District Court para sa Central District of California, Santa Ana, sa mga paratang kabilang ang pagsasabwatan sa sex trafficking sa pamamagitan ng puwersa, panloloko, at pamimilit; sex trafficking ng mga bata; at bulk cash smuggling.
Isang federal arrest warrant ang inisyu para sa kanya noong Nobyembre 10, 2021.
Siya ay kasalukuyang nakakulong sa Pasig City Jail, na naaresto sa Kingdom of Jesus Christ compound sa Davao City matapos ang ilang buwang pagtatago. RNT/MND
