KUMPIYANSA ang National Food Authority (NFA) na bibili ng mas maraming palay (unhusked rice) mula sa mga lokal na magsasaka sa 2025 habang tinataas ng gobyerno ang buffer stock target nito mula siyam na araw hanggang 15 araw.
Ayon sa NFA ang buffer stock ay tumutukoy sa pinakamainam na antas ng imbentaryo ng bigas na dapat panatilihin sa anumang oras upang magamit para sa mga emerhensiya at upang mapanatili ang mga programa ng pamahalaan sa pagtulong sa kalamidad sa panahon ng kalamidad.
Kaugnay nito sa isang pahayag nitong Martes, nagpahayag ng kumpiyansa si NFA Administrator Larry Lacson na makakamit nila ang kanilang mga layunin sa pagbili sa buong bansa sa kabila ng mga inaasahang hamon.
“Naniniwala ako na sa tulong ng lahat, kayang-kaya natin ito. Kahit maraming challenges, panatag ang NFA this year and moving forward,” ayon sa opisyal.
Kabilang sa mga hamon na binanggit niya ay ang pagpapalabas ng mga binili na stock ng NFA rice, ang kapasidad ng bodega para sa tumaas na buffer stock, at ang inaprubahang badyet sa ilalim ng 2025 General Appropriations Act (GAA).
Para sa 2024, sinabi ni Lacson na nakuha ng NFA ang 95 porsiyento ng 300,000 metric tons (MT) target procurement nito.
“Pagkatapos lamang na mailabas ng NFA ang mga stock ng bigas mula sa mga bodega nito, makakabili ang ahensya mula sa mga lokal na magsasaka,” aniya.
Samantala sinabi ni Lacson na ipinag-utos niya ang pag-aayos ng mga bodega para i-accommodate ang mga papasok na stock ng bigas.
Limitado ang mga release natin sa DSWD (Department of Social Welfare and Development), at ngayong tinaasan na ang buffer stock sa labinlimang araw, mas malaki ang hamon sa warehousing,” ani Lacson.
Sa usapin ng badyet, nagpahayag si Lacson ng kumpiyansa sa suportang nagmumula sa Office of the President (OP).
Para sa 2025, ang NFA ay pinagkalooban ng alokasyon na PHP9 bilyon, kapareho ng badyet noong nakaraang taon. (Santi Celario)
