MANILA, Philippines – Mahigit 250 tirahan ang iniulat na napinsala dahil sa magnitude 5.8 na lindol na tumama sa Southern Leyte noong Huwebes, Enero 23.
Sa briefing, sinabi ni Lord Byron Torrecarion, Office of Civil Defense (OCD) regional director sa Eastern Visayas, na mayroon ding pitong residente ang ginamot sa ospital dahil sa mga sugat dulot ng bumagsak na debris.
Nagsagawa ng aerial inspection sa mga apektadong lugar sina Torrecarion, kasama ang mga representative ng Philippine Institute of Volcanology and Seismology (Phivolcs) at Southern Leyte Rep. Christopherson Yap, partikular sa bayan ng San Francisco na epicenter ng lindol.
“Our inspection aims to further assess the extent of the damage caused by the earthquake and determine the immediate assistance we can provide to the affected families,” ani Torrecarion.
Sa napinsalang bahay, 197 ang nasa San Francisco.
Pitong bahay ang nasira sa Barangay Malico, na kilala bilang landslide-prone area.
Mahigit 20 residente mula sa naturang barangay ang tumutuloy sa gym sa Barangay Marayag.
Samantala, hindi madaanan ang mga kalsada sa barangay Amaga at Himay-angan sa Liloan dahil sa malalaking bitak dulot ng lindol.
“Residents and travelers are advised to avoid these areas for their safety. Clearing operations and assessments are underway and updates will be provided as soon as possible.” RNT/JGC