MANILA, Philippines- Nagsagawa ng major clearing operation ang bagong NAIA Infrastructure Corporation (NNIC) para alisin ang 27 abandonadong sasakyang panghimpapawid mula sa general aviation area ng Ninoy Aquino International Airport (NAIA).
Ayon sa isang pahayag na inilabas noong Sabado, ilang taon nang idle ang sasakyang panghimpapawid, kabilang ang isang Cessna 421B na naka-park sa NAIA mula noong 2009 at isang Boeing 737-200 na hindi nagamit mula noong 2015.
“The continued presence of these aircraft severely limits our operational capacity. Clearing them will allow us to improve airside traffic flow and accommodate increasing passenger and aircraft movements at NAIA,” ayon sa NNIC.
Mula nang kontrolin ang mga operasyon ng paliparan noong Setyembre 2024, nakipagtulungan ang NNIC sa Civil Aviation Authority of the Philippines (CAAP) at Manila International Airport Authority (MIAA) upang matukoy ang mga inabandunang sasakyang panghimpapawid at makipag-ugnayan sa mga may-ari.
Nabatid na ang mga formal notices ay naibigay sa mga rehistradong may-ari o sa kanilang mga awtorisadong kinatawan bago pa man isagawa ang nasabing operasyon.
Nananawagan ang NNIC sa mga may-ari ng sasakyang panghimpapawid na makipag-ugnayan kaagad sa kumpanya upang i-verify ang pagmamay-ari at ayusin ang pagkuha o tamang pagtatapon. Ang pagkabigong tumugon ay magreresulta sa pag-alis at pagtatapon ng sasakyang panghimpapawid alinsunod sa mga umiiral na batas at regulasyon. JAY Reyes
