MANILA, Philippines- Iniulat ng Bureau of Immigration (BI) ang matagumpay na pag-aresto sa limang dayuhan sa magkahiwalay na intelligence operations sa Pangasinan at Ifugao, bilang bahagi ng pinaigting na kampanya nito laban sa mga overstaying alien at foreign national na lumalabag sa mga kondisyon ng kanilang pananatili.
“The Philippines is not a haven for undocumented and abusive foreign nationals. Those who disrespect our laws and overstay without proper documentation will be arrested, deported, and blacklisted,” ani BI Commissioner Joel Anthony Viado.
Naganap ang unang pag-aresto sa Dagupan City, Pangasinan, kung saan dinakip ng mga operatiba ng BI mula sa Regional Intelligence Operations Unit (RIOU) 1, sa pakikipag-ugnayan sa Philippine National Police (PNP) Region 1, si Emmanuel Emeka Ndukwe, 34-anyos na Nigerian national.
Inaresto si Ndukwe noong Abril 25 sa harap ng Parish of St. Louis-Marie Grignition de Montfort sa Brgy. Bolosan dahil napag-alaman na ito ay undocumented at may hawak ng isang expired na pasaporte.
Gayunpaman, nang dinala sa pangunahing tanggapan ng BI ay naging marahas si Ndukwe at pinalo ang dalawang tauhan ng imigrasyon, kabilang ang isang nars na nagsasagawa ng mga medikal na pagsusuri, na nagresulta sa mga pinsala ng mga ito.
Samantala, sa hiwalay na operasyon sa Ifugao noong Abril 28, inaresto ng mga operatiba ng BI intelligence mula sa RIOU-Cordillera Administrative Region (CAR) at RIOU-2 ang apat na Chinese national sa Lagawe, Ifugao.
Nabatid sa BI na si Yang Yongxiang, 53, ay inaresto sa Ibulao Hydro Power Plant dahil sa labis na pananatili at pagtatrabaho nang walang permit. Kasama niya ang dalawa pang Chinese national na sina Yuan Tonghua at Zeng Jiakuan, na nabigo rin na magpakita ng mga valid passport o immigration documents. Ang tatlo ay natagpuang nagtatrabaho sa pasilidad bilang mga inhinyero at superbisor na walang kaukulang mga permit.
Isang kaugnay na operasyon sa Lagawe noong araw ding iyon ang humantong sa pagkakaaresto kay Gan Yiyun, isang 30-anyos na Chinese national at asawa ng isa sa mga naarestong indibidwal.
Siya ay dinakip sa isang establisyimento na tinawag para sa hindi awtorisadong pagtatrabaho, maling representasyon, at kabiguan na iulat ang kanyang pagbabago ng paninirahan bilang paglabag sa mga batas sa pagpaparehistro ng Pilipinas at sa Philippine Immigration Act. Ang kanyang visa ay nagpapahiwatig ng trabaho sa Maynila, ngunit siya ay naninirahan at nagtatrabaho sa Ifugao mula noong nakaraang taon.
Lahat ng limang dayuhan ay dinala sa BI main office sa Maynila para sa booking, biometrics, at legal proceedings. Sumailalim sila sa preliminary investigation ng BI Legal Division at pagkatapos ay inilagay sa BI Warden Facility sa Taguig City para sa pansamantalang pagkulong habang nakabinbin ang mga paglilitis sa deportasyon. JAY Reyes
