MANILA, Philippines — Mahigit 466,000 kilo ng basura ang nakolekta mula sa 369 coastal, river, waterway at underwater sites sa buong bansa sa isinagawang International Coastal Cleanup (ICC) nitong Sabado, Setyembre 19, ayon sa Department of Environment and Natural Resources (DENR).
Mahigit 103,000 volunteers mula sa lahat ng 17 rehiyon ang lumahok sa cleanup drive, kabilang ang mga kinatawan ng national government agencies, lokal na pamahalaan, paaralan, pribadong sektor, civic groups at mga komunidad.
Kabilang sa mga pinakamaraming nakolektang basura ang food wrappers, paper at plastic cups at plates, polystyrene food containers, straw at stirrer.
Ayon sa DENR, tinimbang, pinaghiwa-hiwalay at itinala ayon sa uri ang mga nakuhang basura upang makatulong sa pagtukoy ng marine litter patterns at pagbuo ng mas angkop na waste-management interventions.
Sa Metro Manila lamang, mahigit 36,000 katao ang lumahok sa cleanup operations sa 11 lugar kabilang ang Baseco Beach, Manila Bay Dolomite Beach, Pasig River, Las Piñas-Parañaque Wetland Park at Tanza Marine Tree Park.
Binigyang-diin ni DENR Secretary Juan Miguel Cuna na hindi sapat ang regular na paglilinis ng mga dalampasigan at daluyan ng tubig kung patuloy namang nakararating dito ang basura.
Aniya, kailangang palakasin ang waste segregation, reuse, recycling at responsableng pagtatapon ng basura habang pinipigilan pa lamang itong maging polusyon.
Tinukoy rin ng DENR ang papel ng malalaking negosyo sa ilalim ng Extended Producer Responsibility Act of 2022, na nag-aatas sa mga sakop na kumpanya na mabawi ang bahagi ng plastic packaging na inilalabas nila sa merkado.
Ayon sa kagawaran, pangmatagalang solusyon ang pagpigil sa basura bago pa ito makarating sa mga ilog at dagat, sa halip na umasa lamang sa cleanup operations. RNT
