Navotas City, Green Antz sanib-pwersa sa Plastic Waste Recovery Program

NAVOTAS CITY — Isang makabuluhang hakbang tungo sa mas malinis at mas luntian na lungsod ang isinagawa ng Pamahalaang Lungsod ng Navotas sa pamamagitan ng pormal na pakikipagkasunduan sa Green Antz Builders, Inc. para sa pagpapatupad ng plastic waste recovery program.

Pinangunahan nina Mayor John Rey Tiangco at Green Antz General Manager Elinor Quilas ang paglagda ng Memorandum of Agreement (MOA) noong Lunes. Layunin ng kasunduan na pahusayin ang pamamahala ng basura, lalo na ang pagbawi at pagproseso ng basurang plastik sa lungsod.

Sa ilalim ng kasunduan, magbibigay ang Green Antz ng:

-Makinarya at teknolohiya para sa waste recovery,

-Pagsasanay sa tamang paghihiwalay ng basura,

-Suporta sa pagpapatakbo ng Material Recovery Facility (MRF),

-At pagkolekta ng malinis at tuyong plastik mula sa MRF.

Magbibigay rin sila ng insentibo sa mga kalahok ng programa bilang bahagi ng pagpapalawak ng partisipasyon ng komunidad.

Sa kanyang pahayag, binigyang-diin ni Mayor Tiangco na ang inisyatiba ay bahagi ng malawakang layunin ng lungsod para sa kapaligiran at pagtugon sa climate change.

“This partnership with Green Antz strengthens our efforts towards a cleaner, greener, and more sustainable Navotas,” ani Mayor Tiangco. “Through proper waste management and active community participation, we can make a significant impact for future generations.”

Nanawagan din siya sa mga Navoteño na maging aktibo sa paghihiwalay ng basura at umiwas sa pagtatapon ng plastik sa mga daluyan ng tubig, na aniya’y may direktang epekto sa kalikasan at kinabukasan.

“Our small everyday actions can have a huge impact in protecting our environment and our future,” dagdag ng alkalde.

Dumalo rin sa MOA signing si City Environment and Natural Resources Office (CENRO) Chief Ms. Yzabela Bernardina Nazal-Habunal, na nagpahayag ng buong suporta sa inisyatiba bilang bahagi ng pagpapatupad ng mga programang pangkalikasan sa lungsod. Jojo Rabulan