MANILA, Philippines – Nagbabala ang Department of Environment and Natural Resources–Mines and Geosciences Bureau (DENR-MGB) na 664 barangay sa Luzon, kabilang ang 412 sa Metro Manila, ang posibleng maapektuhan ng pagbaha, landslide, flash flood, at debris flow mula Hulyo 3 hanggang 6, dulot ng Low Pressure Area (LPA) at habagat.
Batay ito sa Geohazard Advisory No. 1 ng ahensya, gamit ang rainfall accumulation forecast sa ilalim ng READY Program para sa epektibong community-based disaster risk management.
Sa NCR, kabilang sa mga barangay na nanganganib ay ang:
117 sa Maynila
114 sa Quezon City
16 sa Marikina
1 sa Pasig
164 sa Caloocan, Malabon, Navotas, at Valenzuela
Paliwanag ng MGB, binaba ang threshold values sa NCR dahil hindi agad sumisipsip ng tubig ang lupa sa mga urban area, na nagdudulot ng surface runoff at pagbaha.
Sa Northern at Central Luzon, kabilang sa listahan ang:
118 barangay sa Cagayan
105 sa Isabela
81 sa Zambales
36 sa Bataan
2 sa Apayao
2 sa Kalinga
25 sa Ilocos Sur
Pinaalalahanan ng MGB ang mga LGU at DRRM councils na magpatupad ng pre-emptive evacuation sa mga lugar na may mataas na panganib, linisin ang mga ilog, at bantayang mabuti ang mga nasa tabing-ilog.
Pinayuhan din ang mga lugar na hindi pa kasama sa listahan na manatiling alerto sa posibleng biglaang pagbabago ng panahon. Santi Celario
