Pinakabatang prelate itinalaga ng Santo Papa na bagong Calapan bishop

MANILA, Philippines – Pinangalanan ni Pope Francis ang pinakabatang Catholic prelate ng bansa bilang bagong obispo ng Apostolic Vicariate of Calapan sa Oriental Mindoro.

Inanunsyo ng Vatican noong Huwebes ang pagkakatalaga ng 49-anyos na si Bishop Moises Cuevas, kasalukuyang auxiliary bishop ng Archdiocese of Zamboanga, iniulat ng Catholic Bishops’ Conference of the Philippines (CBCP) sa kanilang news website noong Biyernes.

Si Cuevas, na nagmula sa Batangas City, ay naordinahan bilang pari ng Zamboanga archdiocese noong 2000.

Marso 2020 nang itinalaga siya ng Santo Papa bilang auxiliary bishop ng archdiocese.

Si Cuevas din ang apostolic administrator ng Archdiocese of Zamboanga habang hinihintay ang installation ng bagong Zamboanga Archbishop Julius Tonel sa Agosto 22.

Hahalili ang bishop-elect kay Bishop Warlito Cajandig, na siyang pinuno ng nasabing pwesto mula 1989 hanggang 2022.

Noong Nobyembre 2022, inihayag ng Holy See na “pinalaya” ng Papa ang 79-taong-gulang na si Cajandig mula sa kanyang opisina para sa mga kadahilanang pangkalusugan.

Si Cajandig ay na-stroke noong 2018 at sumailalim sa operasyon sa utak.

Pagkatapos ay hinirang ng obispo si Fr. Nestor Adalia bilang apostolic administrator upang pamahalaan ang vicariate. Jocelyn Tabangcura-Domenden