MANILA, Philippines – Idinineklara ng Supreme Court na kailangan munang nahatulan ang isang indibidual bago makakuha ng kompensasyon bunsod ng maling pagkakulong.
Sa desisyun na pinonente ni Associate Justice Maria Filomena D. Singh, pinagtibay ng Supreme Court En Banc ang desisyun ng Department of Justice Board of Claims’ (Board) na hindi ibigay ang hinahabol na compensation claim ng hinihinalang miyembro ng Anu Sayyaf na si Main T. Mohammad.
Taon 2017 nakulong at kinasuhan si Mohammad ng piracy at dalawang bilang ng kasong murder.
Naabswelto si Mohammad sa kaso dahil sa kabiguan ng prosekusyon na magprisinta ng testigo na magpapatunay na si Mohammad ang kaparehong tao na kinasuhan.
Naghain si Mohammad ng compensation claim sa Board sa Zamboanga City at ginamit na basehan ang Section 3(a) ng RA 7309 (An Act Creating a Board of Claims Under the Department of Justice for Victims of Unjust Imprisonment or Detention and Victims of Violent Crimes and for Other
Purposes) kung saan binibigyan ng kompensasyon ang sinuman na maling naakusahan, nahatulan at nakulong.
Ibinasura ito ng Board of Claims dahil hindi naman ito nahatulan ng korte.
Ayon sa SC, para mapagkalooban ng kompensasyon kinakailangan na ito ay hindi makatarungan na nahatulan, nakulong at kalaunan ay napawalang sala.
“In the present case, the Court found that all elements were lacking..no reason was given to show there was unjust accusation other than the fact that Mohammad was detained for two years, only to be acquitted. Without bad faith on the part of the prosecution, an accusation
based on probable guilt that later leads to an acquittal may be considered erroneous but not necessarily unjust,” iginiit ng Korte.
Hindi rin nahatulan si Mohammad dahil dinismis ng mababang korte ang kaso laban sa kanya. TERESA TAVARES
