MANILA, Philippines – Nakakuha ng karagdagang suporta ang Pambansang Pabahay para sa Pilipino (4PH) Program ni Pangulong Ferdinand Marcos Jr. matapos na pumirma ng kasunduan ang Manila Electric Co. (Meralco) sa Department of Human Settlements and Urban Development (DHSUD) para mabigyan ng kuryente ang mga proyekto nito.
Pumirma ng memorandum of understanding (MOU) sina DHSUD Secretary Jose Rizalino Acuzar at Meralco executive vice president at chief operations officer Ronnie Aperocho upang makapaghatid ng serbisyo ng kuryente sa 4PH project sites sa mga area of coverage ng kompanya.
“We view our collaboration with Meralco as a significant leap toward our mission. Meralco’s commitment to provide reliable, safe, and efficient electric services to Metro Manila and nearby provinces directly contributes to the betterment of housing communities in major urban areas in the country,” ani Acuzar.
Samantala, nagpaabot ng buong suporta ang Meralco sa nagpapatuloy na rollout ng 4PH Program sa National Capital Region at mga kalapit na lugar.
Nangako rin ito na patuloy na magbibigay ng impormasyon sa mga bagong homeowners tungkol sa kanilang karapatan at obligasyon bilang electric consumers.
Kabilang sa MOU ang paglikha ng technical working group na maghahatid ng electrification services sa 4PH projects ng DHSUD at magpatupad ng mga mekanismo para makapagbigay sa mga benepisyaryo ng mas maayos na customer experience.
“Sa Pambansang Pabahay, gusto nating isulong hindi lamang ang pagtatayo ng mga pabahay kundi pati ang pagtataguyod ng township development na may kumpletong pasilidad at serbisyo para sa mga maninirahan dito,” sinabi pa ni Acuzar.
“Ang utos ng Pangulong Bongbong Marcos ay ang pagtatatag ng mauunlad at sustainable township developments para sa Bagong Pilipinas.” RNT/JGC
