MANILA, Philippines- Arestado ang pitong indibidwal na umano’y sangkot sa online fraud sa Pampanga, sinabi ng National Bureau of Investigation (NBI) nitong Biyernes.
Kinilala ng NBI ang mga naaresto na sina Arnel Bautista Dayrit, Reniel Vergara Pabalan, Sharlene Manliclic Agustin, Amanda Eunice Roaquin Turalde, Mark Jhondell Dumarus Padua, Vanesa Manliclic Agustin, at Kaey Ann Agustin Pabalan.
Ayon sa NBI, ang operasyon ay ikinasa noong Setyembre 20 ng pinagsanib na pwersa ng NBI-Pampanga District Office (NBI-PAMDO) at Philippine Air Force’s (PAF) 301st Special Mission Group and 300th Air Intelligence Security Wing.
Isinilbi ang search warrant, Seize and Examine Computer Data (WSSECD) laban sa FXTM USDT FOREX TRADING na matatagpuan sa Barangay Salapungan sa Angeles City, Pampanga.
Sa nasabing operasyon, nakumpiska rin ang 85 units ng desktop computers; 114 units ng assorted cellular phones; iba’t ibang SIM cards at gamit na SIM card chips; at ilang dokumento na naglalaman ng e-mails, passwords at cryptocurrency wallet addresses.
Ayon pa sa NBI, isinagawa ang operasyon matapos makatanggap ng impormasyon ang NBI-PAMDO na ang FXTM USDT FOREX TRADING ay isang “cryptocurrency scamming hub na target ang mga dayuhan mula US, Middle East at Europe.”
Ang mga naaresto at apat na opisyal ng nasabing establisimyento ay sasampahan sa Angeles City Prosecutor’s Office ng kasong may kaugnayan sa Cybercrime Prevention Act of 2012.
Hindi na binanggit ng NBI ang pangalan ng apat na opisyal. Jocelyn Tabangcura-Domenden
