Signal No. 1 itinaas sa Catanduanes, ilang bahagi ng Visayas sa pagtama ni ‘Kristine’

MANILA, Philippines- Pumasok na ang tropical depression sa silangan ng Southern Luzon sa Philippine Area of Responsibility ng alas-12 ng hatinggabi nitong Lunes at pinangalanang Kristine, base sa PAGASA.

Itinaas ang Tropical Cyclone Wind Signal No. 1 sa Catanduanes at ilang parte ng Visayas, base sa 5 a.m. bulletin ng weather bureau.

Ang mga lugar sa ilalim ng TCWS No. 1 ay:

• Catanduanes

• northeastern portion ng Northern Samar (Laoang, Palapag, Mapanas, Gamay, Catubig, Lapinig); at 

• northeastern portion ng Eastern Samar (Jipapad, Arteche, San Policarpo, Oras).

Makararanas ang mga lugar na ito ng hanging may bilis na 39 hanggang 61 km/h sa loob ng 36 oras, na nagbabadyang magdulot ng “minimal to minor threat to life and property.”

Babala ng PAGASA, ang pinakamataas na TCWS na maaaring itaas dahil kay Kristine ay TCWS No. 4.

Inaaasahang kikilos si Kristine sa kanlurang direksyon ngayong Lunes hanggang Martes ng umaga, saka magtutungo sa direksyong west northwestward to northwestward simula Martes ng hapon hanggang sa natitirang bahagi ng forecast period.

Nakaamba itong mag-landfall sa Northern Luzon sa Biyernes ng hapon.

Nagbabadya ring lumakas si Kristine sa tropical storm sa susunod na 12 oras, saka magiging severe tropical storm category sa Martes ng hapon o gabi. Posible rin itong umabot sa typhoon category ng Huwebes ng hapon o gabi bago mag-landfall sa northeastern portion ng Cagayan.

“Since this tropical cyclone is still over the Philippine Sea, further intensification is likely, given the favorable environmental conditions (high SST and low wind shear) for development over the area. Changes in forecast track is also not ruled out, depending on the movement of the weather systems over the mid-latitude over the next days,” pahayag ng PAGASA.

Pinayuhan ng weather bureau ang publiko at kaukulang disaster risk reduction and management offices na mag-ingat at magsagawa ng mga hakbang upang protektahan ang buhay at mga ari-arian. RNT/SA