BILANG pakikiisa ng inyong Agarang Serbisyo Lady sa obserbasyon ng buong buwan ng October bilang “Breast Cancer Awareness Month” (BCAM), tatalakayin ko naman ang mga uri ng kanser sa suso.
May iba’t ibang tipo ng kanser sa suso, nariyan ang Angiosarcoma, Ductal carcinoma in situ (DCIS), Inflammatory breast cancer, Invasive lobular carcinoma, Paget’s disease of the breast, recurrent breast cancer, at ang male breast cancer.
ANGIOSARCOMA na isang bihirang uri ng kanser na nabubuo sa lining ng mga daluyan ng dugo at mga lymph vessel na bahagi ng immune system. Kinokolekta nito ang mga bacteria, virus, at mga basura mula sa katawan at itinatapon ang mga ito.
Maaaring lumitaw at mabuo ang kanser na ito saanmang parte ng katawan, ngunit madalas itong lumilitaw sa balat ng ulo at leeg. Bihira, maaari rin itong mabuo sa balat ng iba pang parte ng katawan, tulad ng suso, o kaya’y sa mas malalim na tisyu tulad ng atay at puso.
Ang angiosarcoma ay maaari ring mangyari sa mga lugar na dati nang nalantad sa radiation therapy.
Ang mga palatandaan at sintomas ng angiosarcoma ay maaaring magkaiba depende sa lugar kung saan ito lumilitaw. Kapag nakaaapekto ito sa mga organo, tulad ng atay, puso o suso, madalas itong nagdudulot ng pananakit. Ang ibang sintomas ay depende sa lugar ng angiosarcoma.
Hindi pa malinaw kung ano ang sanhi ng karamihan sa mga kaso ng angiosarcoma. Ngunit may mga saliksik na natukoy na maaaring magpataas ng panganib. Ang angiosarcoma ay nangyayari kapag ang mga selula sa lining ng mga daluyan ng dugo o lymph vessel ay nagkakaroon ng pagbabago sa kanilang DNA. Ang mga pagbabagong ito ay tinatawag na mutations at pinabibilis ang pagdami ng mga selula.
Ang ikalawang klase ng breast cancer ay ang DUCTAL CARCINOMA IN SITU (DCIS). Ito ay isang maagang anyo ng kanser. Sa kondisyong ito, ang mga selula ng kanser ay nakakulong sa loob ng milk duct sa suso at hindi pa kumakalat sa iba pang tisyu ng suso.
Kadalasang natutuklasan ang DCIS sa pamamagitan ng mammogram bilang bahagi ng breast cancer screening o sa pagsusuri ng bukol sa suso. Mababa ang panganib ng pagkalat ng DCIS, ngunit kailangan pa rin itong suriin at pag-aralan ang mga opsyon sa paggamot. Kadalasang kasama sa paggamot ang operasyon at maaaring isama ang radiation therapy o hormone therapy.
Karaniwang hindi nagdudulot ng sintomas, ngunit minsan ay maaaring magdulot ng pagkakaroon ng bukol sa suso at paglabas ng dugo mula sa utong.
