MANILA, Philippines – Pinuri ni Senator Christopher “Bong” Go, chairman ng Senate Committee on Youth, ang Bulacan Youth Congress, kung saan ay binigyang-diin niya ang kritikal na papel ng kabataan sa paghubog ng kinabukasan ng bansa.
Sa pagharap sa humigit-kumulang 400 na dumalo, binubuo ng Sanggunian ng Kabataan (SK) chairpersons at SK officials ng SK Federation mula sa buong lalawigan ng Bulacan, muling pinagtibay ni Go ang kanyang pangako sa pagsusulong ng mga patakarang nagbibigay-kapangyarihan sa mga kabataang lider.
“Kayo ang pag-asa at future leaders ng ating bayan. Sa inyong mga kamay nakasalalay ang kinabukasan ng susunod na henerasyon,” ani Go.
Bilang chairman ng Senate Committee on Youth, aktibong isinusulong ni Go ang mga programa at inisyatiba na nagtataguyod ng edukasyon, pagpapaunlad ng palakasan, at leader training sa mga kabataang Pilipino. Inulit din niya ang kanyang adbokasiya na panatilihin ang mga kabataan sa mga produktibong aktibidad,na nagpapaalala sa kanila na “lumahok sa sports, lumayo sa droga, at laging unahin ang edukasyon.”
Ipinahayag din ni Go ang kanyang buong suporta sa Sangguniang Kabataan (SK), na kinikilala ang kanilang makabuluhang kontribusyon sa grassroots governance. Hinikayat niya ang mga lider-kabataan na maglingkod nang may integridad, manatiling saligan, at manatiling nakatuon sa kapakanan ng kanilang mga komunidad. Kaugnay nito, binanggit niya ang kanyang pagiging awtor ng Senate Bill No. 2816, na naglalayong magtatag ng apat na taong takdang termino para sa mga opisyal ng barangay at SK.
