MANILA, Philippines – Inihatid ng gobyerno ng Pilipinas ang 25 pang mga overseas Filipino worker (OFWs) mula sa Israel pabalik sa bansa sa patuloy na repatriation program dahil ilang Pilipino ang piniling umalis sa kabila ng pinabuting sitwasyon ng seguridad sa Middle East.
Sinabi ni Department of Migrant Workers (DMW) Secretary Hans Leo Cacdac na dumating ang bagong batch ng mga OFW mula sa Israel sa Ninoy Aquino International Airport Terminal 3 sa Pasay City, nitong Linggo, Hulyo 6.
“We continue to implement a whole-of-government to assist our OFWs, from extending assistance for their basic needs up to the voluntary repatriation,” saad ni Cacdac.
Pagdating, ang mga repatriate ay binigyan ng health check-up ng Department of Health at ng Manila International Airport Authority (MIAA) medical team.
Sinabi ni Overseas Workers Welfare Administration (OWWA) Administrator PY Caunan na nagbigay sila ng agarang tulong pinansyal sa ilalim ng kanilang flagship programs: AKSYON Fund at Emergency Repatriation Fund, bukod sa hiwalay na cash aid mula sa DSWD.
“They were also given TESDA training vouchers for their upskilling while staying in the country and medical check-up and referral assistance from the DOH,” ani Caunan.
Binubuo ng 25 OFWs ang ika-39 na batch ng mga repatriate mula sa Israel sa ilalim ng boluntaryong repatriation program ng gobyerno ng administrasyong Marcos.
May kabuuang 72 OFW ang sumailalim sa voluntary repatriation mula nang sumiklab ang sigalot ng Iran-Israel.
Mula noong Oktubre 2023, may kabuuang 1,405 Filipino migrant workers ang nakauwi sa pamamagitan ng repatriation program sa ilalim ng gabay ni Pangulong Marcos Jr. RNT/MND
