MANILA, Philippines – Ipinaalam ng Senate Impeachment Court sa Korte Suprema na hindi nito masusunod ang resolusyong inilabas noong Hulyo 8 hinggil sa detalye ng impeachment laban kay Pangalawang Pangulo Sara Duterte, dahil wala itong access sa rekord ng Kamara.
Sa manifestation na inihain noong Hulyo 15, sinabi ng Senado na wala itong kaalaman sa hinihinging impormasyon gaya ng petsa, pag-endorso, at pagpapadala ng Articles of Impeachment, na saklaw umano ng Kamara.
“Sumasalamin ito sa pagtupad ng Senado sa kooperasyon at paggalang sa hudikatura habang sinusunod ang takdang tungkulin ng bawat institusyon,” ayon kay Regie Tongol, tagapagsalita ng Impeachment Court.
“Respondent Senate manifests that it lacks sufficient knowledge or information on the matters stated under items (a) to (k) of the said Resolution, and thus, is not in a position to respond to the Honorable Court’s directive,” dagdag pa ng Senado.
Hiningi rin ng Senado na ituring ng Korte Suprema na sapat na tugon ang kanilang manifestation. RNT
