MANILA, Philippines – Naghain si Senador Robin Padilla ng Senate Resolution No. 141 na nananawagan ng imbestigasyon sa ulat na si dating senador Antonio Trillanes IV ang itinalaga ng pamahalaan para magsagawa ng welfare check kay dating Pangulong Rodrigo Duterte sa The Hague.
Ayon kay Padilla, dapat linawin kung may opisyal na awtoridad ang naturang pagtatalaga at kung naaayon ito sa batas na pumapayag sa pribadong indibidwal na kumatawan sa estado sa harap ng internasyonal na tribunal.
“Such alleged designation raises questions of legality, constitutionality, and propriety of designating private individuals to represent the State before international tribunals and the extent of accountability of such designations to the Filipino people,” saad sa resolution.
“The Senate, in exercise of its oversight and legislative functions, must look into this matter to ensure transparency, accountability, and to craft possible legislative measures that will provide clearer guidelines on the conduct of government representatives before international bodies,” dagdag pa.
Sagot ni Trillanes, mas mainam na si Vice President Sara Duterte na lamang ang magtanong sa kanyang ama kung totoong bumisita siya rito.
Paliwanag naman ng DFA, bahagi ng tungkulin ng mga embahada ang magsagawa ng welfare checks alinsunod sa Vienna Convention upang protektahan ang kapakanan ng mga Pilipino sa ibang bansa.
Nananatiling nakakulong si Duterte sa The Hague dahil sa kasong crimes against humanity kaugnay ng drug war. RNT
