SIMULA nitong October 1, 2025, tatanggap na ang SSS ng aplikasyon para sa MySSS Card. Unang magpapatupad nito ang RCBC sa pamamagitan ng digital arm nitong DiskarTech.
Ayon kay SSS president at chief executive officer Robert Joseph De Claro, dalawang pangunahing layunin ang tinutupad ng MySSS Card, ito ay nagsisilbing opisyal na ID kapalit ng Unified Multi-Purpose Identification (UMID) card, at nagsisilbi rin bilang debit card na nakakabit sa isang savings account.
Ang card ay ipamamahagi sa pamamagitan lamang ng mga partner banks ng SSS. Magsisimula ito sa Rizal Commercial Banking Corporation at susundan ng iba pang bangko kagaya ng Asia United Bank, China Bank, at Union Bank of the Philippines. Dagdag pa ni PCEO De Claro, awtomatikong magsisilbing pangunahing disbursement account ng mga miyembro ang MySSS Card.
Available ang MySSS Card sa lahat ng SSS members, pensionado, claimants, benepisyaryo, at representative payees na may mga sumusunod na requirements:
May permanent SS number;
May aktibong account sa My.SSS Portal na may updated na personal na detalye (local address, mobile number, at email);
Nakarehistro sa Philippine Statistics Authority (PSA) sa ilalim ng National ID System (PhilSys).
Maaaring mag-aplay ang mga may lumang SSS, UMID, o dating ID card upang palitan ito ng bagong MySSS Card. Simple lamang ang proseso – mag-aplay sa My.SSS, pumili ng partner bank, at pumayag sa data sharing sa pagitan ng SSS, National ID system, at bangko. Pagkatapos ng online verification at identity confirmation, bubuksan ang account sa pamamagitan ng mobile app o pagpunta sa branch. Para sa RCBC, DiskarTech app ang gagamitin.
Ang partner bank ang gagawa at magdi-distribute ng card. Para sa mga residente ng Metro Manila, matatanggap ito sa loob ng 15 working days, samantalang 20 working days naman para sa mga nasa labas ng Metro Manila.
Tinukoy ni PCEO De Claro na ang paglulunsad ng MySSS Card ay bahagi ng mas malawak na inisyatiba ng pamahalaan na pinangungunahan ni DOF Secretary at SSC ex-officio chairperson Recto upang lalo pang mapahusay ang serbisyo ng SSS.
