Matapos hilingin ni Senador Rodante Marcoleta ang pagbabalik kay ex-DPWH official Brice Hernandez sa Senado mula sa PNP Custodial center, nagdesisyon ang Senado na ilipat na lamang si Hernandez sa Pasay City Jail. CESAR MORALES
MANILA, Philippines – Humiling ng house arrest ang tatlong dating inhenyero ng DPWH-Bulacan 1st District na sina Henry Alcantara, Brice Hernandez, at Jaypee Mendoza, ayon kay Senate President Vicente “Tito” Sotto III nitong Lunes.
Gayunman, nilinaw ni Sotto na wala pang desisyon ang Senate Blue Ribbon Committee, na siyang nagpataw ng contempt laban sa tatlo.
“Letter request pa lang meron silang tatlo… [The Committee] has not decided. Will wait for Senator Erwin Tulfo,” ani Sotto.
Si Senator Erwin Tulfo, na vice chair ng komite, ay itinalagang acting chairperson ng Blue Ribbon Committee.
Si Hernandez ay ipinailalim sa contempt noong Setyembre 8, habang sina Alcantara at Mendoza ay noong Setyembre 18, kaugnay ng imbestigasyon sa umano’y anomalya sa mga flood control project ng DPWH.
Patuloy ding nakakulong sa Senado ang kontraktor na si Pacifico “Curlee” Discaya II, matapos ibasura ng Senado ang kanyang habeas corpus petition, na iginiit na ang pagpataw ng contempt ay bahagi ng konstitusyonal na kapangyarihan ng mataas na kapulungan. RNT
