Labor group naghahanda ng malawakang protesta sa pagbisita ni Trump sa PH

MANILA, Philippines – Malawakang protesta ang sasalubong kay US President Donald Trump sa kanyang pagbisita sa Pilipinas para sa 49th ASEAN Summit, ayon sa labor alliance na All Workers Unity (AWU).

Sa pahayag nitong Biyernes, Nobyembre 6, sinabi ng AWU na maglulunsad ito ng mga kilos-protesta bilang pagtutol sa mga polisiya ng administrasyong Trump na anila’y nakaaapekto sa mga manggagawang Pilipino sa loob at labas ng bansa.

Binubuo ang alyansa ng mga manggagawa mula sa private sector, gobyerno, education, healthcare, agriculture, transport, business process outsourcing at overseas sectors.

Tinuligsa ng grupo ang “Make America Great Again” agenda ni Trump, na inilarawan nitong nagsusulong umano ng mga patakarang nakasasama sa lokal at overseas Filipino workers, partikular sa usapin ng ekonomiya at migration.

Binatikos din ng AWU ang papel ng Estados Unidos sa mga sigalot at tensyon sa iba’t ibang bahagi ng mundo. Ayon sa grupo, may epekto ang mga ito sa pandaigdigang ekonomiya, inflation at tunay na halaga ng sahod ng mga manggagawa.

Kinondena rin ng alyansa ang lumalawak na military cooperation ng Pilipinas at US, na ayon dito ay naglalagay sa bansa sa gitna ng geopolitical competition ng Washington at Beijing.

Tinutulan din ng grupo ang mga bilateral economic at technology initiatives gaya ng Pax Silica.

Ayon sa AWU, nangangamba silang magamit ang mga ganitong programa upang palawakin ang impluwensya ng US sa critical minerals, semiconductor industry at artificial intelligence infrastructure ng Pilipinas.

Iginiit din ng grupo na maaaring makaapekto sa mga magsasaka at rural communities ang lumalawak na military at economic footprint ng US, kabilang ang umano’y displacement, pagtaas ng production costs at problema sa food security.

Tinanggihan naman ng AWU ang panawagang tratuhin lamang bilang karaniwang diplomatic visit ang pagdating ni Trump.

Iginiit ng grupo ang karapatan nitong magsagawa ng mapayapang kilos-protesta at hinikayat ang mga manggagawa na lumahok sa kanilang mga nakatakdang mobilisasyon.

“Trump is not welcome in the Philippines,” pahayag ng AWU. RNT