MANILA, Philippines – Pinuri ni Taguig City Mayor Lani Cayetano ang Taguig City Police Station (TCPS) sa matagumpay na serye ng operasyon laban sa kriminalidad ngayong Oktubre na nagresulta sa pagkakaaresto ng mga high-value target, kabilang ang No. 2 Most Wanted Person ng NCRPO, at sa pagkadismantle ng mga operasyon ng iligal na droga sa iba’t ibang barangay.
Kinilala ni Mayor Lani ang pamumuno ni PCOL Byron F. Allatog, hepe ng Taguig City Police Station, sa mabilis at mahusay na koordinasyon ng kanyang mga tauhan para mapanatili ang kapayapaan at seguridad sa lungsod.
> “Ipinapakita ng mga tagumpay na ito ang dedikasyon at propesyonalismo ng ating mga pulis. Pinupuri ko ang tapang at walang sawang pagsisikap ng mga tauhan ng Taguig City Police sa pagpapanatili ng kapayapaan at kaayusan,” pahayag ni Mayor Lani.
Sa buwang ito ng Oktubre, nagsagawa ang Taguig Police ng ilang mahahalagang operasyon, kabilang ang:
Pag-aresto sa NCRPO’s Top 2 Most Wanted Person – Noong Oktubre 7, naaresto ng mga pulis si Jomar Salik y Radzak, 21, na itinuturing na Top 2 Most Wanted Person (Regional Level) dahil sa kasong murder, sa isang operasyon sa Barangay Upper Bicutan.
₱3.8 Milyong Halaga ng Shabu Nakumpiska sa Pembo – Noong Oktubre 1, naaresto ang high-value drug suspect na si Rowel Mendoza, 26, sa isang buy-bust operation, kung saan nakumpiska ang mahigit kalahating kilo ng shabu na tinatayang nagkakahalaga ng ₱3.8 milyon.
₱1.15 Milyong Halaga ng Shabu Nakumpiska sa Upper Bicutan – Noong Oktubre 8, nadakip si James Jason Bagaforo, 35, sa isang rooftop buy-bust operation, kung saan nasamsam ang 169.3 gramo ng shabu na nagkakahalaga ng ₱1.15 milyon.
Bisitang Babae, Nahuling Nagtangkang Magpuslit ng Droga sa Kulungan – Sa pakikipagtulungan sa Bureau of Jail Management and Penology (BJMP), nahuli ng mga awtoridad ang isang babaeng bisita na nagtangkang magpuslit ng ₱95,200 halaga ng shabu sa loob ng Manila City Jail Annex sa Camp Bagong Diwa noong Oktubre 12.
Suspek sa Motorcycle Hold-up Scam, Nadakip – Naaresto ng pulisya si Anthony Robert Santos, na umano’y nasa likod ng serye ng hold-up scam laban sa mga motorcycle taxi riders sa Taguig at karatig-lungsod.
Pag-aresto sa Street-Level Drug Suspect – Sa patuloy na pagpapatrolya, nadakip ng mga operatiba si alias “DCS,” 34, sa Barangay North Daang Hari, at nakumpiska mula sa kanya ang ₱59,160 halaga ng shabu.
Ayon kay Mayor Lani, patunay ang mga tagumpay na ito sa kahalagahan ng matibay na ugnayan ng lokal na pamahalaan at kapulisan sa pagsugpo sa krimen at pagpapatatag ng tiwala ng mamamayan.
> “Bawat pag-aresto at bawat pagbawi ng mga ilegal na bagay ay hakbang tungo sa mas ligtas na mga kalsada at mas matibay na tiwala ng mga mamamayan sa pulisya,” ani Mayor Lani. “Patuloy tayong makikipagtulungan sa law enforcement para makamit ang isang Transformative, Lively, and Caring city.” RNT
