MANILA, Philippines – Nagpaalala si Philippine National Police (PNP) acting chief Lt. Gen. Jose Melencio Nartatez Jr. sa publiko na igalang at irespeto ang official police uniforms.
Ito ay bilang tugon sa viral na larawan ng isang sibilyan na nakasuot ng police uniform na may punit na sleeves bilang Halloween costume.
“The PNP uniform symbolizes service, sacrifice, and integrity. Our uniform is a symbol of our duty to serve and protect the public; this should not be used as a costume or for any gimmickry,” sinabi ni Nartatez sa isang press briefing sa Camp Crame.
Ani Nartatez, iniimbestigahan na ng Criminal Investigation and Detection Group (CIDG) ang insidente sa paglabag sa Article 179 ng Revised Penal Code, na nagpaparusa sa illegal na paggamit ng uniporme at insignias.
Tutukuyin sa imbestigasyon kung saan nakuha ng partygoer ang sinuot na police uniform.
Kasabay nito, inatasan din ni Nartatez ang mga unit ng pulisya na tugisin ang mga illegal na nagbebenta ng police uniform.
Inatasan din ng acting PNP chief ang Anti-Cybercrime Group na i-monitor ang mga online platform at makipag-ugnayan sa e-commerce sites para matukoy at maalis ang unauthorized listings na nagbebenta ng official o imitation ng PNP uniforms.
Nitong Lunes, Nobyembre 3 ay ipinresenta ng National Police Commission ang sangkot sa viral na larawan na kinilalang si Daryll Isidro, na humingi naman ng tawad sa kanyang nagawa.
Tinanggap naman ni Nartatez ang public apology ni Isidro ngunit iginiit na kailangan ding matuto ng publiko sa tamang paggalang sa official symbols ng mga awtoridad.
“We appreciate the apology and urge everyone to take this issue as a learning opportunity. The uniform represents the trust and responsibility vested in our police officers; it should always be treated with respect,” sinabi pa ni Nartatez. RNT/JGC
