MANILA, Philippines – Opisyal na pinalawig ni Pangulong Ferdinand “Bongbong” Marcos Jr. ang rice import ban hanggang Disyembre 31, 2025 upang mapanatili ang katatagan ng merkado at protektahan ang mga lokal na magsasaka mula sa pagbaba ng presyo dulot ng imported rice.
Ang ban, na inutusan noong Agosto at orihinal na tatagal lamang hanggang Oktubre 30, 2025, ay sumasaklaw sa regular at well-milled rice, ngunit hindi kabilang ang specialty rice varieties.
Itinakda ng Executive Order 102 ang Departments of Agriculture (DA), Trade and Industry (DTI), at Economy, Planning, and Development (DepDev) na suriin ang epekto ng suspensyon sa loob ng 30 araw at magsumite ng rekomendasyon kung palalawigin o paikliin ang import ban.
Ayon sa datos ng Philippine Statistics Authority (PSA), bumaba ang farmgate price ng palay mula ₱17.11 kada kilo noong Agosto hanggang sa ₱8 kada kilo, habang ang commercial rice sa merkado ng Metro Manila ay naglalaro sa ₱37.10 hanggang ₱57.76 kada kilo.
Kabilang sa mga naunang hakbang ang EO 101 na nagpapatupad ng Sagip Saka Act, na nag-uutos sa lahat ng ahensya ng gobyerno na direktang bumili ng mga produkto mula sa accredited farmers’ at fisherfolk cooperatives upang suportahan ang maliliit na prodyuser. RNT
