MULING nagpaalala ang Metropolitan Manila Development Authority (MMDA) sa publiko na mahigpit na ipinagbabawal ang paggamit ng rollerblades, skateboard, at iba pang katulad na kagamitan sa mga pampublikong kalsada, matapos ang isang viral video na nagpapakitang may mga indibidwal na nag-iiskeyting sa gitna ng daan sa Metro Manila.
Ayon sa MMDA Special Operations Group – Strike Force, delikado ang ganitong uri ng aktibidad at dapat lamang itong gawin sa mga itinalagang lugar katulad ng mga skate parks o sports facilities.
Bagama’t walang driver’s license ang mga gumagamit ng rollerblades o skateboard at hindi maaaring tiketan sa ilalim ng traffic violations, maaari pa rin silang sitahin at pagsabihan ng mga awtoridad.
Paglilinaw ng MMDA, pwede rin sitahin ng mga opisyales ng barangay at ang mga pulis.
Ipinaalala rin ng MMDA na ang mga kalsada ay para sa mga sasakyan at pedestrian, hindi para sa mga “stunts” o libangan.
Pinaalalahanan ng MMDA ang publiko na dapat silang maging mas responsable at maingat sa paggamit ng mga pampublikong daan, at isaalang-alang ang kaligtasan ng lahat, hindi lamang ng kanilang sarili.
Alinsunod sa MMDA Regulation No. 96-009, ipinagbabawal ang paggamit ng anomang uri ng device o laruan na maaaring magdulot ng panganib o abala sa daloy ng trapiko, kabilang dito ang mga skateboard, roller skates, scooter, at iba pa. Ang mga lalabag ay maaaring sitasin, pagbawalan, o patawan ng kaukulang disciplinary action ng mga lokal na awtoridad.
Bukod dito, pinayuhan ng MMDA ang mga kabataan at magulang na gamitin ang mga skate parks at recreational areas na inilaan ng mga lokal na pamahalaan para sa ligtas na pag-eensayo at libangan.
Karaniwang kadahilanan kung bakit ipinagbabawal ang rollerblades at skateboard sa pampublikong kalsada:
1. Safety Concerns – ang mga kalsada ay idinisenyo para sa mga sasakyang at mabilis ang pagtatakbo ng mga motorista. Ang mga rollerblade at skateboard ay hindi makakasabay sa trapiko ng sasakyan, mapanganib para sa mga gumagamit.
2. Kakulangan ng Proteksyon: Ang mga kalsada ay kadalasang walang sapat na proteksyon para sa mga gumagamit ng hindi naka-motor. Pinatataas nito ang panganib sa mga motorista maaksidente lalo na kung mabilis ang takbo ng kanilang sasakyan.
3. Traffic Laws: Maraming hurisdiksyon ang may mga partikular na batas na naghihigpit o nagbabawal sa mga hindi de-motor na sasakyan sa mga highway upang matiyak ang kaligtasan ng lahat ng gumagamit ng kalsada.
4. Pagkagambala sa Daloy ng Trapiko: Ang pagkakaroon ng mas mabagal na paggalaw ng mga rollerblade o skateboard ay maaaring makagambala sa daloy ng trapiko, na humahantong sa mga potensyal na panganib para sa parehong mga skater at motorista.
