MANILA, Philippines – TINATAYANG nasa higit P.8 milyon halaga ng high-grade marijuana o “Kush” ang naharang ng mga tauhan ng Bureau of Customs (BOC) Port of Clark na natagpuan sa loob ng parsela na idineklarang naglalaman ng “Labubu” keychains.
Ayon sa BOC, nasa 538 gramo ng marijuana ang nadiskubre, na napag-alamang nagmula sa Hong Kong at nakatakdang ipadala sa Biñan, Laguna.
Nabatid sa BOC na dumating ang parsela noong Nobyembre 15, 2025, at pinigil ng mga tauhan ng X-ray Inspection Project (XIP) ng BOC dahil sa mga kahina-hinalang larawan na ipinakita sa panahon ng pag-scan.
Noong Nobyembre 19, nagsagawa ang mga operatiba ng Philippine Drug Enforcement Agency (PDEA) ng K-9 sniff test, na nagbunga ng positibong indikasyon para sa narcotics.
Sumunod ang isang buong pisikal na pagsusuri, na nagpakita ng dalawang (2) kahon ng “Labubu” keychains. Ang bawat kahon ay naglalaman ng dalawang transparent na selyadong supot na puno ng mga tuyong dahon at mga namumungang tuktok na pinaghihinalaang mataas ang uri ng marijuana.
Kinumpirma naman ng PDEA na ang mga isinumiteng sample sa kanila ay nagtataglay ng tetrahydrocannabinol (THC), isang aktibong sangkap sa marijuana at isang mapanganib na gamot sa ilalim ng Republic Act No. 9165, bilang inamyenda.
Isang Warrant of Seizure and Detention ang inisyu laban sa shipment dahil sa paglabag sa Section 118(g), Section 119(d), at Section 1113 paragraph (f), (i), at (l) ng Republic Act No. 10863, o kilala bilang Customs Modernization and Tariff Act (CMTA), kaugnay ng R.A. No. 9165. Jay Reyes
