Nagbigay-seguridad ang PRO 1 sa inspeksyon ng mga flood control project sa Bauang at Tubao, La Union noong Setyembre 16, 2025, kasama sina PBGEN Dindo R. Reyes, ICI Adviser Benjamin Magalong, at DPWH Sec. Vince Dizon.
MANILA, Philippines – Naghain ang Commission on Audit (COA) ng apat na Fraud Audit Reports (FARs) sa Independent Commission for Infrastructure (ICI) sa umano’y talamak na iregularidad sa flood control projects sa Bulacan na nagkakahalaga ng P297 milyon.
Sa pahayag nitong Sabado, Nobyembre 29, sinabi ng COA na ang apat na kwestyonableng proyekto ay ipinatupad ng Department of Public Works and Highways (DPWH) – Bulacan 1st District Engineering Office (DEO).
Ang mga kontrata nito ay iginawad sa Wawao Builders at SYMS Construction and Trading, ang dalawang kompanya na iniimbestigahan dahil sa umano’y kaugnayan sa korapsyon sa flood control projects.
Sinabi ng komisyon na ang mga proyekto ay “found to contain serious and recurring signs of misuse of public funds.”
Ayon sa COA, ang mga audit “expos[e] rampant irregularities in flood control projects in Bulacan worth of P297 million.”
Sa paggamit ng salitang “Audit Shock,” sinabi pa ng komisyon na ang technical inspections, satellite imagery review, at fraud audit procedures nito ay nagpakita ng “serious and recurring issues in the implementation” ng apat na flood control projects.
Kabilang sa mga isyung nakita ng COA ay ang ghost projects, unauthorized relocation, kabayaran para sa existing o pre-existing structures sa naaprubahang lugar, at “egregious” documentation gaps.
Maaalala na ipinag-utos ni COA Chairperson Gamaliel Cordoba ang fraud audit ng flood control projects ng DPWH sa Bulacan mula Hulyo 1, 2022 hanggang Mayo 30, 2025 para tugunan ang lumalalang pangamba ng publiko sa “ghost projects” at korapsyon sa infrastructure projects.
Wala pang tugon ang Wawao Builders at SYMS Construction and Trading kaugnay nito. RNT/JGC
