TUGUEGARAO CITY, Philippines – Nananatiling lubog sa tubig ang ilang kalsada sa Tuguegarao City, Cagayan matapos bumuhos ang mga pag-ulan sa lalawigan at hindi pa rin madaanan ang mga kalsadang ito dahil sa baha.
Sinabi ng state weather bureau na ang Northeast Monsoon (Amihan) ay nakakaapekto sa Batanes at Babuyan Islands, habang ang easterlies ay nakakaapekto sa iba’t ibang bahagi ng Luzon at maging sa Metro Manila.
Samantala, inaasahan naman ang localized thunderstorms sa Visayas, Mindanao, at ilang bahagi ng Palawan.
Magdudulot pa rin ng pag-ulan sa Kalayaan Islands ang labangan o buntot ng Tropical Storm Koto (dating Verbena) na nasa labas na ngayon ng Philippine Area of Responsibility.
Ayon sa datos ng Metro Weather, inaasahan ang pag-ulan sa malaking bahagi ng Luzon, habang ang malakas hanggang sa matinding pag-ulan naman ay maaaring maranasan sa ilang bahagi ng Benguet.
Maaaring maramdaman ang kalat-kalat na pag-ulan sa Visayas at Mindanao.
Sa Metro Manila, maasahan ang magandang panahon sa Lunes ng umaga na may posibilidad na umulan sa hapon hanggang gabi. RNT/MND
