MANILA, Philippines – Anim na pulis mula sa Criminal Investigation and Detection Group (CIDG) ang inilagay sa restrictive custody dahil sa alegasyong pagnanakaw ng P13.4 milyon na ebidensiya mula sa POGO raid sa Bataan noong Oktubre 2024, ayon kay Interior Secretary Jonvic Remulla nitong Martes.
Ang kabuuang halagang nakumpiska sa raid ay PHP141.1 milyon, ngunit natuklasan ang nawawalang P13.4 milyon matapos ang inventory nang ideklara ng korte na ilegal ang operasyon.
Kabilang sa mga opisyal na nasasangkot ay sina Pat. Rolman Andaya, Executive M/Sgt. Erick Castro, Senior M/Sgt. Michael Camillo, Pat. Kenji Francisco, Pat. Jesus Fulgencio, at Pat. Raymark Solas.
Sinasampahan sila ng kaso sa qualified theft, malversation of public funds, falsification of documents, opening of closed documents, at illegal possession of false treasury notes.
Ayon kay CIDG Chief Maj. Gen. Robert Alexander Morico, maghahain din ng administrative cases para sa grave misconduct, serious dishonesty, at paglabag sa protocol sa paghawak ng ebidensya.
Pinuri naman ni National Police Commission Vice Chair Rafael Vicente Calinisan ang mabilis na aksyon ng PNP leadership, at binigyang-diin na walang lugar ang kurakot na pulis sa puwersa. Santi Celario
