MANILA, Philippines – Sinabi ni Department of the Interior and Local Government (DILG) Secretary Jonvic Remulla na base sa unang resulta ng imbestigasyon, tila sinuri ni dating DPWH Undersecretary Catalina Cabral ang isang bangin sa Tuba, Benguet bago siya pumanaw.
Ayon kay Remulla, habang papunta pa lamang sa Baguio, pinatigil umano ni Cabral ang sasakyan sa eksaktong lugar, bumaba, at lumapit sa gilid ng bangin.
Napansin ito ng mga pulis at pinaalalahanan silang bawal ang pagparada doon, kaya nagpatuloy sila sa hotel.
Makalipas ang ilang oras, bumalik si Cabral sa parehong lugar, kung saan siya kalauna’y natagpuang wala nang buhay.
Ipinaliwanag ng kalihim na ang lugar ay may malalim na bangin, kaya ito ay itinuturing na mapanganib.
Ayon sa kanya, sinusukat ng mga imbestigador ang “seriousness of intent” batay sa lethality ng piniling lugar.
Nagbitiw sa puwesto si Cabral noong Setyembre kasabay ng mga imbestigasyon sa Kongreso kaugnay ng umano’y iregularidad sa mga flood control projects ng DPWH.
Nauna na rin siyang inaasahang iimbitahan ng Independent Commission for Infrastructure (ICI) bilang resource person sa hiwalay na imbestigasyon.
Ayon pa kay Remulla, walang nakitang senyales ng foul play ang autopsy.
Wala ring indikasyon ng pananakit ng ibang tao, at ang sanhi ng pagkamatay ay dulot ng matinding pinsalang resulta ng pagkahulog, batay sa opisyal na pagsusuri.
Dagdag niya, walang palatandaan ng pakikipagbuno, walang ebidensiya ng baril o kutsilyo, at walang nakitang banyagang DNA na magpapahiwatig ng krimen.
Patuloy pa ring sinusuri ng mga awtoridad ang mga pangyayari upang tuluyang mabuo ang kaso. RNT/MND
