MANILA, Philippines – Nagtayo na ng checkpoints upang pigilan ang pagpasok sa six-kilometer permanent danger zone ng Mayon Volcano sa Albay, na nasa Alert Level 3 dahil sa pyroclastic density currents o “uson.”
Isinasagawa na ang pre-emptive evacuation sa Camalig, Ligao City, Malilipot, Daraga, at Guinobatan, na apektado ang humigit-kumulang 2,899 residente.
“Technically, dapat walang tao doon kasi it’s a permanent danger zone. Even at Alert Level 0, dapat walang tao doon. We recognize the reality on the ground that there are people actually living there,” ayon kay PHIVOLCS Director Teresito Bacolcol.
Technically, it’s erupting, it’s just that it’s an effusive eruption. That is our ‘quiet eruption,’ a slow release of magma from the edifice of the volcano,” dagdag pa niya.
Binalaan ang publiko na ang exposure sa “uson” ay maaaring magdulot ng agarang kamatayan o hirap sa paghinga depende sa kapal nito.
“Mga nasa six kilometers, dapat sumunod tayo. Kasi we want to emphasize na no man’s land ‘yan ‘pag ganitong alert level,” giit naman ni Albay Governor Noel Rosal.
Bagaman ipinagbabawal ang pagpasok sa danger zone, sinabi ng Department of Tourism (DOT) na ligtas para sa mga turista ang pagmamasid sa bulkan mula sa malayo at ligtas na lugar.
Ayon kay DOT Bicol Director Herbie Aguas, mas maraming turista ang bumibisita sa lugar tuwing may unrest sa Mayon, na may mga hakbang pangkaligtasan. Santi Celario
