Manila Flood Command Center, pinasinayaan

MANILA, Philippines – PINANGUNAHAN ni Manila Mayor Francisco “Isko Moreno” Domagoso ang groundbreaking ng Manila City Disaster Risk Reduction and Management Office (MCDRRMO) Flood Monitoring Command Center sa Manila North Cemetery nitong Martes ng umaga, Enero 27.

Ang naturang command center ay isang pasilidad na aasahang magpapalakas sa kakayahan ng lungsod na harapin ang baha sa pamamagitan ng real-time na datos at mabilis na aksyon.

Ayon kay Yorme Isko, makakatulong ang command center para masubaybayan ng lungsod ang tubig-baha sa mga ilog, sapa, at iba pang delikadong lugar, lalo na tuwing may bagyo at malakas na ulan.

“Sa pasilidad na ito, magkakaroon tayo ng tamang datos at maayos na monitoring ng baha sa ating lungsod, riverside, at creekside,” ani Domagoso.

Batya sa plano, kabilang sa command center ang control at server rooms, opisina at training area para sa MDRRMO personnel, mortuary, at tatlong fully air-conditioned public viewing rooms, kasama ang mga support facilities tulad ng generator room at elevators.

“Ang tamang impormasyon at maagap na aksyon ay maaaring magligtas ng buhay. Hindi lang sa ilang taon, kundi bawat taon ng buhay natin,” dagdag ng alkalde.

Binanggit ni Domagoso na ang proyekto ay patunay na kaya ng lokal na pamahalaan ang kumilos sa ilalim ng kanilang mandato, habang nagpapatuloy ang imbestigasyon sa mga flood control projects.

Dagdag pa ng alkalde na ang pasilidad ay pagsasamahin ang teknolohiya, environmental measures, at sanay na tauhan, para sa tamang data-driven planning at hindi hulaan lang.

“Sa tamang datos, makakagawa ka ng tamang action plan,” sabi ni Yorme

Bukod dito, magkakaroon din ng libreng fully air-conditioned public viewing rooms para sa mga pamilyang walang espasyo sa kanilang mga komunidad.

“Para sa mahihirap, may air-conditioned public burulan sa tabi ng sementeryo,” ani Domagoso.

Binanggit din ng alkalde na tutugunan ng proyekto ang matagal nang problema sa wastong pangangalaga sa yumaong walang umaangkin, sa pamamagitan ng mortuary at coroner’s office para sa unclaimed bodies at disaster-related cases.

“Sa unang pagkakataon, aalagaan ng City Government ang mga labi sa tamang pasilidad,” dagdag ni Domagoso.

Aniya, ang nasabing proyekto ay tugon sa paulit-ulit na kahilingan ng mga komunidad at bahagi ng pagsisikap ng lungsod na maibalik sa tao ang halaga ng buwis sa pamamagitan ng serbisyong nagpoprotekta sa buhay at nagbibigay dangal. JAY Reyes