MANILA, Philippines – NILIGAWAN ni Pangulong Ferdinand R. Marcos Jr. si Mitsubishi Corporation president and chief executive officer (CEO) Katsuya Nakanishi para sa pagsusulong ng potensyal na Japanese investments na naglalayong lumikha ng trabaho, pabilisin ang mass transport projects, palawakin ang malinis na enerhiya at palakasin ang digital services sa Pilipinas.
“I met with Mr. Katsuya Nakanishi, President and CEO of Mitsubishi Corporation, to advance investments that will create more jobs, help complete faster and more reliable subway and railway systems, and expand clean wind energy in the provinces,” ayon kay Pangulong Marcos.
Winika ng Pangulo na ang panukalang investments ay nakahanay sa pagsusulong ng administrasyon na gawing modernisado ang public transportation, partikular na ang subway at railway systems, para pagaanin ang araw-araw na pagsakay at paghusayin ang madaliang pagkilos sa urban at regional areas.
Susuportahan din ng inisyatibang ito ang pagpapalawak sa renewable energy, partikular na sa wind power, habang tinatrabaho ng gobyerno na pagiba-ibahin ang energy mix ng bansa at i-promote ang ‘sustainable development’ sa mga lalawigan.
“These efforts will also strengthen digital services that make everyday transactions easier for Filipinos as we continue building a Bagong Pilipinas,” anito.
Samantala, ang Mitsubishi Corporation ay mayroong long-standing interests sa Pilipinas, na may investments sa infrastructure, energy, transportation, at industrial projects, dahilan para maging ‘key partner’ ito ng gobyerno pagdating sa economic at infrastructure agenda. Kris Jose
