MANILA, Philippiens – Arestado sa ikinasang buy-bust operation ng Station Drug Enforcement Unit (SDEU) ng Muntinlupa City police ang isang high value individual (HVI) na nakumpiskahan ng baril, granada at shabu na nagkakahalaga ng mahigit P352,000 Linggo ng gabi, Pebrero 8.
Sa report na natanggap ni Southern Police District (SPD) director P/Brig. Gen. Randy Arceo ay nakilala ang inarestong suspek na si alyas Chong, 56, residente ng Barangay Tunasan, Muntinlupa City.
Ayon kay Arceo, nadakip ang suspek sa ikinasang buy-bust operation ng mga tauhan ng SDEU bandang alas 6:20 ng gabi sa Barangay Tunasan, Muntinlupa City.
Sa isinagawang operasyon ay narekober sa posesyon ng suspek ang anim na heat-sealed transparent plastic sachet na naglalaman ng 51.85 gramo ng hinihinalang shabu na nagkakahalaga ng ₱352,580, isang .38 kalibre rebolber na kargado ng apat na bala, isang MK2 fragmentation hand grenade, kulay itim na sling bag, at ang ₱1,000 buy-bust money na ginamit sa operayon.
Kasalukuyang nakapiit sa custodial facility ng SDEU ang suspek na nahaharap sa mga kasong paglabag sa Republic Act No. 9165 (Comprehensive Dangerous Drugs Act of 2002), Republic Act No. 10591 (Comprehensive Firearms and Ammunition Regulation Act), at Republic Act No. 9516 (illegal possession of explosives) sa Muntinlupa City Prosecutor’s Office.
“This accomplishment underscores the firm and sustained commitment of the Southern Police District in dismantling drug networks and neutralizing armed individuals who pose a serious threat to public safety. The arrest of a high-value individual who was not only engaged in illegal drugs but also in possession of firearms and explosives is a major blow to criminal elements operating in our communities. To those who continue to engage in the illegal drug trade and other criminal activities, let this serve as a clear message: the law will eventually catch up with you. Our police officers will not stop until our communities are safe, peaceful, and free from fear,” ani Arceo. James I. Catapusan
