MANILA, Philippines – Nagpahayag ng pag-aalala ang Philippine Food and Drug Administration (FDA) sa dumaraming pekeng at hindi rehistradong produkto, lalo na ang mga gamot na binebenta online.
Ayon kay FDA Director General Paolo Teston, iniisip nilang gawing required sa e-commerce platforms ang pagpapakita ng market authorization form mula sa FDA bilang patunay na rehistrado ang produkto.
“Require these platforms to at least present a valid market authorization form from the Philippine Food and Drug Administration. I’m just threading carefully because I don’t want to be tagged as anti-trade,” ani Teston.
Sinabi rin niya na may lingguhang pagsusuri at pagtanggal ng mga illegal listings sa Meta, TikTok, Lazada, Shopee, Shein, at Carousel.ph, ngunit mabilis na napapalitan ang mga ito. Binanggit niya na may pagtaas ng pekeng rabies vaccines online, at marami sa mga unregistered products ay substandard at delikado sa kalusugan.
Inamin ni Teston na kulang ang manpower ng FDA, kaya nagde-develop siya ng 5-year development plan para sa ahensya, kabilang ang dagdag na budget at tauhan. Layunin din nilang mabawasan ang backlog ng product registration at license-to-operate applications na kasalukuyang nasa 17,000.
“While we’re solving the 16,000 to 17,000 backlogs on the CDRR alone, we’re able to address efficiently the mainstream applications, particularly the OTC and home remedies because they constitute 60-70 percent of the pending applications at the CDRR,” dagdag niya.
Inaasahan ngayong taon na sisimulan ang online registration para sa OTC medicines, dahil ito ang karaniwang ginagamit ng publiko at may mababang panganib kumpara sa ibang pharmaceutical items. RNT/MND
