P382M materyales panggawa ng pekeng yois, nasabat sa Pampanga

PAMPANGA – NASAMSAM ng mga tauhan ng Bureau of Customs (BOC) ang tinatayang ₱382 milyong halaga ng mga materyales para sa iligal na sigarilyo sa isang operasyon sa Apalit, Pampanga noong Marso 5.

Nabatid na isinagawa ang operasyon ng Customs Intelligence and Investigation Service (CIIS) at BOC–Port of Limay bilang bahagi ng pinaigting na kampanya ng pamahalaan laban sa smuggling ng tobacco products, alinsunod sa direktiba ni Ferdinand R. Marcos Jr.

Nag-ugat ang operasyon matapos makatanggap ng ulat ang BOC tungkol sa umano’y iligal na operasyon ng sigarilyo sa isang bodega sa Brgy. Balucuc, Apalit, Pampanga.

Kasama sa joint enforcement team ang mga tauhan ng Philippine National Police, Pampanga Provincial Police Office, Apalit Municipal Police Station, Regional Special Operations Group PRO3, at Bureau of Internal Revenue (BIR).

Sa inspeksyon ng mga awtoridad, nadiskubre sa loob ng bodega ang mga BIR tax stamp na may magkakaparehong serial number, pati ang malaking dami ng packaging materials at cigarette tipping paper rolls na ginagamit sa paggawa ng sigarilyo.

Kabilang sa mga brand na nakalagay sa mga materyales ang Chesterfield, Camel, Mighty, Fortune, Carnival, Fort, Commando, Thunder, H&P, King, at Cannon Menthol.

Ayon sa BOC, umabot sa ₱382 milyon ang kabuuang halaga ng mga nakumpiskang materyales habang patuloy pa ang imbentaryo at imbestigasyon sa naturang bodega.

JAY Reyes