MANILA, Philippines – Naitala ng mga state volcanologist ang lava effusion, pyroclastic density currents (PDCs), at minor strombolian activity sa Mayon Volcano nitong Miyerkules ng gabi, ayon sa Philippine Institute of Volcanology and Seismology (PHIVOLCS).
Ayon sa PHIVOLCS, naobserbahan ang aktibidad alas-10:39 ng gabi noong Marso 11, 2026, habang nagpapatuloy ang effusive eruption ng bulkan sa ika-65 magkakasunod na araw.
“Effusive eruption at Mayon Volcano continues for the 65th consecutive day, generating incandescent lava flows, pyroclastic density currents (PDC) or “uson”, and rockfalls,” ayon sa PHIVOLCS.
“Alert Level 3 prevails over Mayon and entry into the 6-km Permanent Danger Zone must be prohibited,” dagdag ng ahensya.
Mas maaga nitong Miyerkules, iniulat ng PHIVOLCS ang pagdaloy ng lava sa Basud (3.8 km), Bonga (3.1 km), at Mi-isi (1.3 km) gullies, kasabay ng episodic minor strombolian activity.
Naitala rin ang 202 volcanic earthquakes, 361 rockfall events, at 14 pyroclastic density current signals.
Mayroon ding crater glow na inilarawang “fair” at nakikita ng hubad na mata, habang may plume na umabot sa 750 metro sa itaas ng crater na tinangay ng hangin patungong timog.
Ayon sa PHIVOLCS, nananatiling inflated ang edifice ng bulkan, habang nakapagtala rin ng 3,551 tonelada ng sulfur dioxide emission noong Martes. Santi Celario
