MANILA, Philippines – Ipinahayag ni Executive Secretary Ralph Recto ang pangako ng administrasyong Marcos na patibayin ang lokal na pamahalaan sa 2026 General Assembly ng League of Municipalities of the Philippines (LMP) sa Pasay City.
Dinaluhan ng mga alkalde at opisyal ng munisipyo ang pagtitipon sa Marriott Hotel kung saan tinalakay ang mga hamon sa pamamahala at mga programa ng pambansang gobyerno.
Nagpahayag ng pasasalamat ang LMP, sa pamumuno ni National President Mayor Faustino “Inno” Dy V, sa Local Government Support Fund (LGSF) na nagbibigay ng direktang pondo sa mga munisipalidad para sa imprastraktura, serbisyo publiko, at iba pang proyekto.
Ayon sa 2026 General Appropriations Act, tumaas ng PHP34.87 bilyon ang LGSF, na umabot sa kabuuang PHP57.872 bilyon — pinakamalaki sa kasaysayan nito.
Ang pondo ay bahagi ng layunin ng administrasyon na palakasin ang kapasidad ng lokal na pamahalaan at pagbutihin ang serbisyo sa mga komunidad, lalo na sa maliliit na munisipyo.
Ipinakita rin ng LMP ang kanilang mga rekomendasyon para sa reporma sa Local Government Code upang higit pang paigtingin ang lokal na awtonomiya at koordinasyon sa pagitan ng pambansa at lokal na pamahalaan.
Kasama sa LMP ang higit 1,400 na munisipalidad sa buong bansa bilang plataporma para sa pakikipag-ugnayan ng mga lokal na opisyal sa mga ahensya ng gobyerno. RNT/MND
