Vintage bomb, nahukay sa construction site sa Mariveles

BATAAN – Isang vintage bomb na may bigat na 250 lbs ang inulat na natagpuan sa isang construction site ng ginagawang beach resort sa Barangay Malaya, Mariveles.

Sa ulat ng Bataan Explosives and Ordnance Disposal (EOD), nadiskubre ng 35-anyos na backhoe operator na si Dexter Tomas ang bomba habang naghuhukay sa ginagawang development sa isang pampublikong beach sa naturang lugar.

Agad na rumesponde ang mga operatiba ng EOD at maingat na narekober ang vintage bomb na nahukay sa construction site.

Nasa kustodiya ng mga awtoridad ang lumang bomba na hindi sumabog at pansamantalang inilagak sa storage facility habang inihahanda ito para sa tamang disposal.