SAN FERNANDO CITY, PAMPANGA — Sa pagpapatuloy ng eksklusibong panayam ng inyong Agarang Serbisyo Lady kay Regional Director Emmanuel Daez, CESO IV, ng National Commission for Senior Citizens (NCSC) Central Luzon, isa sa mga pangunahing naging paksa ay ang pamamahagi ng centenarian cash incentive at ang mga tinatawag na milestone ages na 80, 85, 90, at 95 taong gulang.
Ayon kay Regional Director Emmanuel Daez, malinaw na may umiiral na programa ang pamahalaan para sa pagkilala at pagbibigay ng insentibo sa mga nakatatandang umaabot sa ganitong edad. Subalit, inamin niya na marami pa rin sa ating mga kababayan at mga pamilya ng seniors ang nalilito dahil sa mga maling impormasyon na patuloy na kumakalat sa social media at sa iba pang hindi beripikadong sources.
“Isa sa mga pangunahing hamon sa kasalukuyan ay ang misinformation,” paliwanag ni RD Emmanuel Daez. May mga bali-balita umanong awtomatiko ang pagbibigay ng lahat ng benepisyo o kaya naman ay may sinasadyang antala (delay) sa pamamahagi, na mariing pinasinungalingan ng direktor. Kaya naman lubos na mahalaga para sa NCSC ang tamang pagpapakalat (dissemination) ng impormasyon. Dagdag pa niya, ang lahat ng benepisyo ay mahigpit na nakabatay sa umiiral na batas at mga alituntunin, at kinakailangang dumaan sa tamang proseso ng validation.
Upang bigyang-linaw ang publiko, inilahad ni RD Emmanuel Daez na noong March 17, 2024 lamang naging epektibo ang pinalawak na batas, at nitong nakaraang taong 2025 lamang ito opisyal na nagkaroon ng kaukulang pondo para sa implementasyon. Dahil dito, ang mga nakatungtong lamang sa edad na 80, 85, 90, at 95 simula nang maging epektibo ang batas ang siyang makakatanggap ng Php10,000.
Nilinaw rin ng direktor na hindi totoong Php25,000 o Php1 milyon ang ibinibigay ng komisyon. Ang makatatanggap lamang ng hanggang Php 100,000 ay ang mga nakararating sa natatanging edad na 100 taong gulang (centenarians).
Mahalagang Paalala: Hindi kasama sa naturang programa ang mga nakatatandang nasa napapagitnaang edad o in-between ages (tulad ng edad 81 hanggang 84, 86 hanggang 89, 91 hanggang 94, at 96 hanggang 99). Ang insentibo ay eksklusibo lamang para sa mga eksaktong nakarating sa edad na 80, 85, 90, 95, at 100.
Bilang mahalagang payo sa mga pamilya, nag-iwan ng paalaala si RD Emmanuel Daez: mga apat (4) na buwan bago sumapit ang milestone birthday ng mga Lolo at Lola ay magpasa na agad ng mga kinakailangang rekisitos sa tanggapan ng NCSC o sa kanilang lokal na yunit. Ito ay upang maagang maiproseso ang mga dokumento at matiyak na mapapasakamay nila ang karampatang benepisyo sa eksaktong araw ng kanilang kaarawan.
