MANILA, Philippines – Ipinahayag ni Sen. Risa Hontiveros noong Lunes na may ilang senador mula sa majority bloc na nagpahiwatig ng interes na lumipat sa minority bloc, sa gitna ng mga usap-usapang posibleng pagbabago sa liderato ng Senado.
Ayon kay Hontiveros, nananatiling 11 ang solidong miyembro ng minority bloc at wala pa umanong pinal na kasunduan o bagong bilang ng mga posibleng lilipat. Dagdag niya, may mga “pag-uusap” tungkol sa posibleng realignment ng mga senador.
“May mga may intensyon pero sa ngayon ang solid na bilang sa minority ay labing-isa pa rin,” ani Hontiveros sa Filipino.
Ito ay kasunod ng ilang linggo matapos ang umano’y pagbabago sa liderato ng Senado, kung saan umupo si Senate President Alan Peter Cayetano matapos ang pagbabago sa majority bloc.
Ayon pa sa ulat, ang minority bloc o Solid Bloc-11 (SB-11) ay nag-endorso kay Sen. Sherwin Gatchalian bilang posibleng bagong Senate President. Kabilang sa bloc ang mga Senador na sina Risa Hontiveros, Kiko Pangilinan, Sherwin Gatchalian, Erwin Tulfo, Raffy Tulfo, Lito Lapid, Panfilo Lacson, Bam Aquino, JV Ejercito, at dating Senate Presidents Vicente “Tito” Sotto III at Migz Zubiri.
Sinabi ni Hontiveros na magiging “magandang” Senate President si Gatchalian dahil sa kanyang pagiging seryosong mambabatas at maayos na pamumuno sa mga komite sa Senado.
Wala pa ring pormal na talakayan, ayon sa kanya, tungkol sa posibleng pagsali ni Sen. Francis “Chiz” Escudero sa minority bloc, ngunit bukas umano ang grupo sa mga kapareho nila ng prinsipyo at layunin. RNT/MND
