MANILA, Philippines — Hindi natinag si Defense Secretary Gilberto Teodoro Jr. sa ipinatupad na sanctions ng China laban sa kanya at sa kanyang pamilya at nangakong ipagpapatuloy ang pagtatanggol sa interes ng Pilipinas.
Sa isang pahayag nitong Biyernes, sinabi ni Teodoro na hindi siya nagpapaapekto sa hakbang ng Beijing at magpapatuloy sa pagtupad sa kanyang tungkulin.
“That is their right. That is truly what they do to those who speak the truth against their deception. Their own countrymen and the others under their control suffer far worse,” pahayag ni Teodoro.
“I will just keep doing my duty and uphold our nation in the face of the wickedness they are committing here and even in our seas,” dagdag niya.
Nauna nang inanunsyo ng Ministry of Foreign Affairs ng China ang sanctions laban kay Teodoro, sa kanyang asawa, at anak dahil umano sa paulit-ulit nitong mga pahayag na nakasasama sa interes ng China at sa ugnayan ng dalawang bansa.
Sa ilalim ng sanctions, ipinagbabawal sa pamilya Teodoro ang pagpasok sa mainland China, Hong Kong, at Macau. Ipinagbabawal din sa mga Chinese entities ang anumang transaksyon, kooperasyon, o iba pang aktibidad sa kanila.
Ayon sa Beijing, layunin ng hakbang na protektahan ang “national sovereignty, security, and development interests” ng China, ngunit hindi nito tinukoy kung aling mga pahayag ni Teodoro ang naging dahilan ng sanctions.
Binatikos naman ng Department of Foreign Affairs ang hakbang ng China at tinawag itong isang “unfriendly act.”
“While the imposition of sanctions is China’s sovereign prerogative, the Philippines views it as an unfriendly act that further complicates the bilateral relations,” ayon sa DFA.
“Such measures do not contribute to building mutual trust, managing differences responsibly, or creating the conditions necessary for constructive engagement between our two countries,” dagdag nito.
Dumating ang sanctions sa gitna ng nagpapatuloy na tensyon sa pagitan ng Maynila at Beijing kaugnay ng mga usapin sa West Philippine Sea. Dave Baluyot
